2Th 2 | KYG | STEP | Konagatimogitapae, Ala kava netimo Yesu Kalaisi'a eminesigetae'mo magokepi lokaeta maisuna kavafe'mo ava gemo hugesune.

2 Thessalonians 2

Alagi hosu vekae'mo ava gemo hu'niya gemae

1 Konagatimogitapae, Ala kava netimo Yesu Kalaisi'a eminesigetae'mo magokepi lokaeta maisuna kavafe'mo ava gemo hugesune. 2 Mago vaya'mogi, Kalaisi afina'mo ago afole ai'niye, hu'a nehaya'monanafa lokiya gefati'mo hutae'mo, Goti Auneme'amo'mo laha pai'niye, hu'a hu'nisafi mago vaya'mogi e'a ae'a hakalo hu'a lapa pai'nisafi mago vaya'mogi, Apakaemo lagaefe'mo avo'mo kae'nae, hu'a lapa pai'nisafigi ani gee'mo afitapa lapau o'aitapa lapausoli osiyo. 3 Mago vaya'mogi alu ge alu geleti'mo humi lapategayanagi o'afiyo. Ala kava ne'mo afina'mo fiku afole o'aigiya'monanafa hogote'a muki asole vaya'mogimo Goti ka'mo alagi ne'atalesageno'ae'mo hosu vekamo Goti'a ata kopi'mo lamigiye, huno hu'niya vekamo afole aisigeno'ae'mo ani afina'mo afole aigiye. 4 Ani vekamo'a Gotitimo'mo mai'niye, hu'a nehaya vaya'ai goti'apimogife'mo kame huno apatege mono nehaya goti'apimogife'mo kame huno apatege huno mai'neno'ae'mo, ae'na apakase'na hogote vekamo mai'nove, huno hugiye. Agaemo Goti mono nopi'mo haino mai'neno'ae'mo, Goti'namo mai'nove, huno hugiye. 5 Lapakae'e'mo mai'ne'nae'mo ani gemo ago lapa pai'novana ago lapake kani'nifiye. 6 Lapakaemo ago age'nayana mago kava'mo'a ka akani male'niyanageno afole aisiya afina'mo alagi afole aigiye. 7 Hemenimo mago vaya'mogimo alagi hosu vekamo'a hisiya agufa kava'mo nehaya'monanafa ka'mo alino ne'akaniya vekamo'a ka akanime akanime ne'visigeno'ae'mo hosu vekamo muki vayapati'mo afole aigiye. 8 Ani afina'mo muki ke'aepa gemo amagino ne'ataleya vekamo muki vaya'ai apaulagale'mo afole aisigeno'ae'mo Ala kava ne'mo alino alave nehisigeno emineno avamusa aisiya kayoteti'mo alagi amagigiye. 9 Afole aiteno Satani himamu'aleti'mo lokiya alagena aune kava'mo no'agaya aigofe aune kava'mo hugiye. 10 Agaemo muki agufa agafa aigofe hosu kava'aleti'mo Goti'a alino apago'ya lagauno apatalesiya vaya'aife'mo humi apategaiye. Apakaemo Goti'a apakufamo alino katino apatesiyafe'mo lama gee'mo alagi ohapau'nisige'a lageso hugae. 11 Ani kava'mo hugaya'mofe'mo Goti'a, aigofe gemo afa'a afigae, huno alino apami malesige'a aigofe gee'mo, lama gemo hane'niye, hu'a hugae. 12 Na kava hisiyafe'mae. Goti lama ge'ae'mo apakesa afi'a fatago osu'ne'a hosu kavafeke'mo apamogaga ne'aiya vaya'mogi aigofe gemo ne'afisageno agoti huno apateteno'ae'mo, hosu vaya'mo mai'nae, huno hisiyafe'mae.

Goti'a lapakufamo alino katino lapatesiyafe'mo lekana paino lapate'niye, huno hapa pai'niya gemae

13 Ala kava ne'mo'a hau ayamopafi'mo hau'niya konagatimogitapae, huta, Goti'a aepa fai'niya afinateti'mo ago lekana paino lapate'niye. Auneme'amo'mo alino lapaote lapatesigetapa lama ge'ae'mo lapakesa afita fatago hisageno Goti'a lapakufamo alino katino lapatesiyafe'mo lekana paino lapate'niya'mofe'mo muki afina'mo Gotife'mo hao ke heta lapatesuna kava'mo hane'niye. 14 Lagaemo alagepa faigoko ge'amo aeta hakalo huta lapa nepaunageno'ae'mo Goti'a Ala kava netimo Yesu Kalaisi ha le konali ya'amo alisayafe'mo keya ae'niye. 15 Konagatimogitapae, huta, ani kava hu'niya'mofe'mo aeta hakalo huta lapa pai'nona gele'e avo'mo kae'nona gele'e'mo o'ataletapa atafauta alagi hutapa maiyo. 16 Afotimo Goti'a lagaefe'mo hau ayamopafi'mo hau'nigeno muki afina'mo lokiya vaita mai'neta lavayagunagu huta agava maisunafe'mo fiku laha maeno lami'niye. Agae'e Ala kava netimo Yesu Kalaisi'e'mo muki alagepa gemo huge muki alagepa kava'mo huge hutapa maisayafe'mo lapa mae'ana lapaipamo ali'ana lokiya vai'ana lapate'anageta maiyo.